Gründungsgeschichte

Vonere Geburt wot i verzelle, vo ganz fasnachtsverruckte Gselle wo bi dene damals bestandne Strukture und Mimose dr Szene z Olte dr Marsch hei welle blose.
Zu dere Zit, das müsst Dir wüsse, hei sich d Sänger und d Lärmisclique noni so möge küsse. S hei au noni aui Guggemusige nach höcherem chöne strebe bi däm damalige musikalische Lotterläbe.

Zu dere Zit, zwänzg Johr ischs här, es isch de no rueig zuegange, ganz familiär, hei mir is, es paar Fründe, regelmässig troffe und, näbscht allerlei Vergnüeglichkeite, au öppe eis gsoffe.
Es isch denn so cho, wies glaub het müesse: Die Bandi isch mit irne wiibliche Süesse,
mit Ski und Sack und Pack, das isch es Gschänk, i Schnee, und zwar uf Adelbode Länk, dänk!

Dört si mir vergnüegte junge Meitschi und Burschte ufs mol umgäh vo klassische Bärgler, düei mitne drinke uf es bsundrigs Wohl. Mir hei ne gnosse, dä frömdi Alkohol
und Aente Büsi trunke, ganz frivol…
Das Aente Büsi het eus bewegt, zumene bsundere Schwur, mir heis in Ehre ghalte und trunke, mit Bravour, a mehrere Öbe, duregfüert die Prozedur und eus denn gschwore, do ane göi mer wieder i d Kur.

So isch s denn au gsi, mit Lobgesang, es paar Mönet spöter, der glichi Wandelgang.
Böbu het er gheisse, wo am meischte het möge drinke: nach 6 1/2 Dezi het er de gnueg gha, i glaube sini Auge düei hüt no blinke…
Das ischs denn au ändgültig gsi: dr Name Aente Büsi het gwürkt wie ne Epidemie.
mir händ is wohl gfühlt, wie das isch unter guete Fründe und churz drufabe dr Grundstei gleit, um e Guggemusig z gründe!

Zwölf Näsinne und Nase, mir händ is Müeh gä, und gspielt bis i d Ekstase keine vo eus het vo Fasnacht und Musig viel verstande, und doch hei mir die erschti Fasnacht mit grossem Erfolg glücklich überstande.
Ghört hei mir vom Duremache, bis am Morge, denn träff sich d Fasnachts-Elite im Ring zum Zmorge. Au mir hei welle derbi si bi dä ganz Grosse, hei aber der Wecker müesse stelle, dass mir nid verschlofe.

Afänglich hei mir halt noni so guet gspielt, derfür guraschiert. I dr Zwüschezit isch mit eusere Clique viel passiert, wenn mer hüt zämestöi, lauft alles wie gschmiert, und musikalisch, das muess me säge, tönts rächt kultiviert. Mir alli do chönd is mit eusere Gugge identifiziere. Mir düent is au alli immer glich koschtümiere. Zwänzg Johr ischs här, e Grund zum jubiliere: drum due ig, dr Dino, Euch allne härzlich gratuliere!
Dino Rossi, Gründungsmitglied